15 saal pahle.

Bacchpan ki yaadein saayad sabhilogon ki sabse anmol yaadon me se ek hoti hain.
Main kareeb 5 saal tak apne gaon me hee raha tha.2000 me patna aa gaya tha,patna aane ke baad bhi kareeb har 2mahinon par gaon chala hee jaata tha,kyunki maa wahin rahti thee.
Papa Patna me rahte the or unko gaon gaye 6 mahine tak ho jaate the unhone kaafi sangharsh kiya apni zindagi me,aage chalkar jeet unki hee hui.
Papa ki naukari 1999 me saayad hui.
Papa jab bhi gaon jaate the ek #Kismibaar chocolate jaroor le jaate the mere liye.
Wo chocolate or papa ke saath baithkar khaane me jo khooshi milti thee,uski toolnaa koi nahin kar sakta.
Ek mere chotkaa baba hain jo mere bacchpan ke samay Patna me naukari karte the.Wo aaj bhi hain,patna me hee rahte hain or mujhe #Yuvraaj kahkar bulaate hain.Khair main unkaa Yuvraaj rahoon yaa naa rahoon wo mere liye hamesha ek anmol ratan rahenge.
Agar kisi ko tyaag or pariwaarik jeevan kaa koi bhi cheej sikhna hai,to uske liye wo ek university hain.
Mujhe yaad hai ki wo har 15 din par meri har jarurat waali cheejon ke saath gaon haajer ho jaaya karte the,chaahe jeth kaa mahina ho yaa bhaado kaa.
Jab baba patna aane lagte the,toh mere nakhre dekhne laayak hote the.
Saara khar meri khaatirdaari karne me vyasta.
Aaj main jahan bhi hoon ussme unkaa bhi bahut bara yogdaan hai.
Abb unke baare me kya kahoon,sabd kam parne lagte hain.

Punpun se Narmada tak

Jab nadiyon ki baat hoti hai toh mere mann jiss nadi ki pahli tasveer aati hai wo gumnaam Punpun nadi ki tasweer hoti hai.
Bacchpan me pahli baar jiss nadi ko dekha wo Punpun hee thi.
Jahan tak Punpun ke baare me jaantaa hoon toh ye nadi koi gumnaam jagah se nikalkar,gumnaam logon ki bhoomi ko apne bheetar samaati phir koi gumnaam jagah jaakar gaayab ho jaati hai.
Phir Gangaa nadi ko dekha jab meri pardaadi kaa 2000 me dehaant hua tha.Gangaa ke baare me bacchpan me yahi khayaalat the ki wah paani ki koi jagah hai jahan marne ke baad logon ko jalaaya jaata hai.Bacchpan se jo sunnate aaya tha ki marne ke baad jo log Gangaa jaate hain,unhe swarga kaa dwaar miltaa hai.
Dheere-dheere Gangaa ko jaana or samjhaa.Ye bhi jaana ki Gangaa ko dhaarmik rang me kaise rang diyaa gaya hai,ye bhi jaana ki Gangaa par sirf aaryaveer hinduon kaa hee haq hai.
Pata chala ki Gangaa ke paani ko keshariya karne ki kosheesh ki jaa rahi hai.
Phir apni tarah se socha toh pata chala ki paani kaa toh rang#Colourless hota hai,phir toh Gangaa sabki hai.Gangaa par kisi kaa ekaadheekaar nahin hai.
Phir Son nadi ko dekha,isski gumnaami Punpun se thodi kam hai.Ye Amarkantak se nikalkar Bihaar tak jaati hai or phir saayad Gangaa me mil jaati hai.
Ek saptaah pahle kucch college ke doston ke saath Amarkantak ghumne jaane kaa plan bana.
Main toh thahraa naastik,issliye mandiron ko dekhne ki iccha naa thi,Amarkantak me mandiron kaa samooh hai.
Narmada kis prakaar nikalti hogi ,baar-baar yahi baat ko soch raha tha.
Khair dekh bhi liyaa ki Narmada kaise nikalti hai,jahan se Narmada nikalti hai wahan nahaaya bhi.
Agar koi nadiyon se apne liye kucch sikhnaa chaahta hai toh usse nadiyon ko ek vidyaarthi bankar dekhna chaahiye naa ki ek karmkaandi bankar.
Nadiyaan toh khair humein bahut kucch sikhaati hee hain,par bass humein unhe ek vidyaarthi bankar dekhna hota hai.
Aaj bass itna hee.

Ohh,aap naa.

Mujhe kabhi-kabhi aisa mahshoosh hota hai ki meri jimmedaariyaan abb kucch had tak jaroor badh gai hai.
Mere ghar me ek chotki jo aai hai.

Main kabhi-kabhi usske baare me sochkar apne me hee hastaa hoon.
Aisa sochta hoon ki ,wo jab badi ho jaaegi toh bolego-Aap naa,aap naa,har baat me philosophy hee dete hain,mere mann kaa koi kucch naa hone deta hai naa karne deta.
Aap naa bass.Kya jab mere umar me aisi philosophy sunte the toh accha kya lagta tha.
Main bolungaa-Arre nahin re chotki tum toh bass humhee par attack kartee ho.
Jo karna hai bass apne man se or poori lagan se karo naa,tumhe koi nahin rokega.
Bass itna sunkar wo kahegi-Lele..
.aap naa,aap naa duniyaa ke sabse acche mama ho.
Phir kya wo bhi khoosh or main bhi best mama kaa upaadhi paakar gadgad

Nazdeekiyaan Via Whatsapp.

Rishte ko agar rishtaa maankar chala jaaye tabhi tak uski dor majboot rahti hai.
Par aaj ke samay me kiske pass itna waqt hai ki rishte ko yaad rakha jaaye.
Aaj ke apartment culture ke samay me log toh apne maai-baap tak ko bhoolne lage hain,khair rishtedaaron ki kucch bishaat hee nahin hai.
Ek peedhi beeta nahin ki log apne puraane waale rishtedaaron ko bhoolne lage or bhool jaate hee hain.
Aaj ke samay me Whatsapp or Hike jaise social networking site kucch tarah se rishte ko jorne me madad karte hain,chaahe wo mere formality hee kyun naa ho.
Aajkal koi aadmi,aadmi ko bina lobh-laalach ke yaad hee karle,wahin bahut Bari baat hai.
Khair jo mera mann or anubhaw jo ki bahut kam hai,wo yahi kahtaa hai ki apne logon se maane family ke logon se batiyaane me jo sukoon miltaa hai,wo or kahin nahin miltaa.Ekdum khulaa hoke batiaao,bina koi formality ke,bina koi kaam ke,ekdum free or relax hokar.
Khair yah doosri baat hai ki aaj ke mere jaise mere nawjawaan saathiyon inn baaton se accha Chetan Bhagat or Ravinder Singh ke third class majanua type ke story ko padhnaa maante hain.


Humlogon ko Whatsapp pe jodne ke liye dhanyawaad.
Kam kam se issi tarah baat hoti rahein.
Dhanyawaad.
Via Whatsapp Mid-Night blogging.

Ye Sahar Kitna Ajeeb Hai.

Ye sahar kitna ajeeb hai,yahan kaun utna kareeb hai.
Har sahar apne andar ek sahar liye rahta hai.Iss sahar me koi kisi ke kareeb nahin hai.
Log daftar jaate hain,aate hain or ye silseela iss sahar me zindagi bhar chalta hai.
Log ek-doosre se milte hain,par Milne ke liye nahin bass apne kaam ke liye.
Iss sahar me Mall,Shopping complex toh hain,par wo bhi apne aap me ek sunaapan hee liye hain.Har jagah log apne me hee vyasta hain,wo chaahe sadak ho yaa daftar ho yaa shopping mall.

Kisi ke liye ye sahar,sahar hai toh,toh kisi ke liye ye bass jine kaa jareeya hai.
Log naa chahte hue bhi iss sahar ko chahne lagte hain kyunki naa chahte hue bhi ye sahar unko apne andar samete leti hai or iss naa rukne wali zindagi me bhi,ek nayi zindagi deti hain.
Ye sahar nahin hai,ye ek aasha hai,ye sahar nahin hai,ye sahar me rahne walon ki jivanrekha hai.
Ye sahar nahin,ye meri jaan hain,ye meri aabroo hain.
Ye sahar nahin,ye mera pyaar hai.
Ye meri bhautikwaadi dil ki dhadkan hai.

The stage is all set for a mega-cricket match between two natural rival of the game i.e. India and Pakistan.
Hope,India will maintain it's record against Pakistan in the world cup matches.
Hope a good and fair game from both the sides with some sorts of cricketing agtession too.
Hope,India will maintain the jinx against Pakistan.
But,miss my heroes like Yuvraj,Gambhir,Bhajji,Jack and my favorite Sehwag.
All the best to India.
Hoping a great game.

Mera Wo Gaon

Kabhi kabhaar kisi chij ki yaad apne aap aane lagti hai,Khaaskar jab yaad hamari yaadon se joora hota hai toh yaar or bhi andar tak sama jaati hai .

Aaj ekaek mujhe apne gaon ki yaad aa rahi hai.Aisa lag raha hai ki aaj mujhe wahan hona chahiye that,apne sabse pyaare se jagah hona chahiye tha,apne bachpan ke yaadon wala jagah par hona chahiye tha.
Maa,bhaiyaa,Didi kabhi mere bagair gaon nahi gaye the pahle kabhi kucch saalon se.
Iss baar aisa hua ,wo log ghar gaye or main Raipur me bass yaadon ki baarat nikaal raha hoon.
Iss baar agar main hora toh kitna maja aata kyunki saath me iss baar meri chutki #Bhaginiyaa bhi rahti.

Pata nahin kyun mujhe sahar ke aalishaan maals,theaters,apartments apni ore kheech nahi paate,jitna ki mera wo ekaant me,sahar ke dhool se mukt,bilkul dehaati duniyaa wala mera gaon.
Apne pariwaar se lagaaw yaa gaon se lagaaw,mujhe uski ore kheechti hai.
Wo sirf gaon nahin hain,wo apne andar mere bacchpan ke yaadon ko samete hue mere jeevan kaa uddgam jagah hai,jahan par Maine chalna,bolna or baithna seekha.
Aaj jinn vicharon ko main apne andar liye phirtaa hoon.wo issi jagah ki dee Hui ek anmol vastu hai.
Maane saidhaantik or vaichaarik dono mulyon se main apne gaon se joora hua hoon.
Mujhe wo chhote bagiche,wo kuaan ek alag tarah ki shaanti or vishwaash deta hai.
Wo dhaan se lahlahaate khet mujhe apne #Purkhon ki viraasat ko bachaaye rakhne ki prernaa deta hai.
Sarso or Rabi ke phaslon se lahlahaate khet mujhe ye sikh deta hai ki zindagi me apne aap ko kabhi #Dhannaseth mat samajhana.