D.A.V,Ara-Zindagi ko ek safar dene wala jagah

Kisi aadmi ke zindagi ke mukhya daur me school wala jo daur hota hai uski koi toolnaa hee nahin hai.
Ekdum professionalism se hatke,koi cheej ki bahut fikar nahin,jo hoga usko dekha jaaegaa.
Ekdum masti or dosti wala daur.
School aana,jaana,padhai karna ekdum sabkucch jahan sayameet tarike se hota hai.
DAV,Ara jiske chalte meri roti chalti hai,wo bass meri vidyaa ki mandir hee nahin hai,wo mere papa ki karmbhoomi bhee hai.
Dav ne mujhe bahut kucch sikhaya hai,sabse mahatwapurna anushaashan or santoolan.
Samaaj ko dekhne kaa nazariyaa bhi maine wahin sikha hai.
Mere Papa ki dicharyaa Dav ke hee ird-gird ghoomti hai.
Maine unse bahut kucch sikha hai or abhi bhi bahut kucch sikhta hoon,iskaa matlab ki maine jo kucch bhi sikha hai ussme Dav kaa yogdaan raha hai.
Papa apne routine ke itne pakke ki har subah 4:30 me jaag jaate or 5baje mujhe jagaate.
Zindagi me padhai kaa mahatwa bhi Dav ne hee sikhaaya hai.
Kaise ek-ek number ke liye competition hota tha,mujhe aaj bhi yaad hai.
Brajkant,Abhishek,Nandan sab mere sabse acche dost the par exam aate hee cheer-Pratidwandi ho jaate the.
Nandan toh itnaa imaandaar ki mere bagal me hee baithtaa tha par aajtak ussne ek baar bhi kisi se kucch nahin poocha hoga exam ke samay,mujhse bhi nahin.
Maine toh chori aajtak kee hee nahin or naa hee kisi ki kucch madad kartaa tha exam ke samay
Sabkucch Dav ne hee sikhaaya hai.
Dav se nikle 1saal ho jaaenge abb,phir bhi sabhi yaadein abhi mann me zindaa hai or hamesha rahegi.
Jaate-jaate
Kya bhoolon kya yaad karoon,wahan sab itne kareeb hain ki kisi ke baare me kya likhoon.

15 saal pahle.

Bacchpan ki yaadein saayad sabhilogon ki sabse anmol yaadon me se ek hoti hain.
Main kareeb 5 saal tak apne gaon me hee raha tha.2000 me patna aa gaya tha,patna aane ke baad bhi kareeb har 2mahinon par gaon chala hee jaata tha,kyunki maa wahin rahti thee.
Papa Patna me rahte the or unko gaon gaye 6 mahine tak ho jaate the unhone kaafi sangharsh kiya apni zindagi me,aage chalkar jeet unki hee hui.
Papa ki naukari 1999 me saayad hui.
Papa jab bhi gaon jaate the ek #Kismibaar chocolate jaroor le jaate the mere liye.
Wo chocolate or papa ke saath baithkar khaane me jo khooshi milti thee,uski toolnaa koi nahin kar sakta.
Ek mere chotkaa baba hain jo mere bacchpan ke samay Patna me naukari karte the.Wo aaj bhi hain,patna me hee rahte hain or mujhe #Yuvraaj kahkar bulaate hain.Khair main unkaa Yuvraaj rahoon yaa naa rahoon wo mere liye hamesha ek anmol ratan rahenge.
Agar kisi ko tyaag or pariwaarik jeevan kaa koi bhi cheej sikhna hai,to uske liye wo ek university hain.
Mujhe yaad hai ki wo har 15 din par meri har jarurat waali cheejon ke saath gaon haajer ho jaaya karte the,chaahe jeth kaa mahina ho yaa bhaado kaa.
Jab baba patna aane lagte the,toh mere nakhre dekhne laayak hote the.
Saara khar meri khaatirdaari karne me vyasta.
Aaj main jahan bhi hoon ussme unkaa bhi bahut bara yogdaan hai.
Abb unke baare me kya kahoon,sabd kam parne lagte hain.

Punpun se Narmada tak

Jab nadiyon ki baat hoti hai toh mere mann jiss nadi ki pahli tasveer aati hai wo gumnaam Punpun nadi ki tasweer hoti hai.
Bacchpan me pahli baar jiss nadi ko dekha wo Punpun hee thi.
Jahan tak Punpun ke baare me jaantaa hoon toh ye nadi koi gumnaam jagah se nikalkar,gumnaam logon ki bhoomi ko apne bheetar samaati phir koi gumnaam jagah jaakar gaayab ho jaati hai.
Phir Gangaa nadi ko dekha jab meri pardaadi kaa 2000 me dehaant hua tha.Gangaa ke baare me bacchpan me yahi khayaalat the ki wah paani ki koi jagah hai jahan marne ke baad logon ko jalaaya jaata hai.Bacchpan se jo sunnate aaya tha ki marne ke baad jo log Gangaa jaate hain,unhe swarga kaa dwaar miltaa hai.
Dheere-dheere Gangaa ko jaana or samjhaa.Ye bhi jaana ki Gangaa ko dhaarmik rang me kaise rang diyaa gaya hai,ye bhi jaana ki Gangaa par sirf aaryaveer hinduon kaa hee haq hai.
Pata chala ki Gangaa ke paani ko keshariya karne ki kosheesh ki jaa rahi hai.
Phir apni tarah se socha toh pata chala ki paani kaa toh rang#Colourless hota hai,phir toh Gangaa sabki hai.Gangaa par kisi kaa ekaadheekaar nahin hai.
Phir Son nadi ko dekha,isski gumnaami Punpun se thodi kam hai.Ye Amarkantak se nikalkar Bihaar tak jaati hai or phir saayad Gangaa me mil jaati hai.
Ek saptaah pahle kucch college ke doston ke saath Amarkantak ghumne jaane kaa plan bana.
Main toh thahraa naastik,issliye mandiron ko dekhne ki iccha naa thi,Amarkantak me mandiron kaa samooh hai.
Narmada kis prakaar nikalti hogi ,baar-baar yahi baat ko soch raha tha.
Khair dekh bhi liyaa ki Narmada kaise nikalti hai,jahan se Narmada nikalti hai wahan nahaaya bhi.
Agar koi nadiyon se apne liye kucch sikhnaa chaahta hai toh usse nadiyon ko ek vidyaarthi bankar dekhna chaahiye naa ki ek karmkaandi bankar.
Nadiyaan toh khair humein bahut kucch sikhaati hee hain,par bass humein unhe ek vidyaarthi bankar dekhna hota hai.
Aaj bass itna hee.

Ohh,aap naa.

Mujhe kabhi-kabhi aisa mahshoosh hota hai ki meri jimmedaariyaan abb kucch had tak jaroor badh gai hai.
Mere ghar me ek chotki jo aai hai.

Main kabhi-kabhi usske baare me sochkar apne me hee hastaa hoon.
Aisa sochta hoon ki ,wo jab badi ho jaaegi toh bolego-Aap naa,aap naa,har baat me philosophy hee dete hain,mere mann kaa koi kucch naa hone deta hai naa karne deta.
Aap naa bass.Kya jab mere umar me aisi philosophy sunte the toh accha kya lagta tha.
Main bolungaa-Arre nahin re chotki tum toh bass humhee par attack kartee ho.
Jo karna hai bass apne man se or poori lagan se karo naa,tumhe koi nahin rokega.
Bass itna sunkar wo kahegi-Lele..
.aap naa,aap naa duniyaa ke sabse acche mama ho.
Phir kya wo bhi khoosh or main bhi best mama kaa upaadhi paakar gadgad

Nazdeekiyaan Via Whatsapp.

Rishte ko agar rishtaa maankar chala jaaye tabhi tak uski dor majboot rahti hai.
Par aaj ke samay me kiske pass itna waqt hai ki rishte ko yaad rakha jaaye.
Aaj ke apartment culture ke samay me log toh apne maai-baap tak ko bhoolne lage hain,khair rishtedaaron ki kucch bishaat hee nahin hai.
Ek peedhi beeta nahin ki log apne puraane waale rishtedaaron ko bhoolne lage or bhool jaate hee hain.
Aaj ke samay me Whatsapp or Hike jaise social networking site kucch tarah se rishte ko jorne me madad karte hain,chaahe wo mere formality hee kyun naa ho.
Aajkal koi aadmi,aadmi ko bina lobh-laalach ke yaad hee karle,wahin bahut Bari baat hai.
Khair jo mera mann or anubhaw jo ki bahut kam hai,wo yahi kahtaa hai ki apne logon se maane family ke logon se batiyaane me jo sukoon miltaa hai,wo or kahin nahin miltaa.Ekdum khulaa hoke batiaao,bina koi formality ke,bina koi kaam ke,ekdum free or relax hokar.
Khair yah doosri baat hai ki aaj ke mere jaise mere nawjawaan saathiyon inn baaton se accha Chetan Bhagat or Ravinder Singh ke third class majanua type ke story ko padhnaa maante hain.


Humlogon ko Whatsapp pe jodne ke liye dhanyawaad.
Kam kam se issi tarah baat hoti rahein.
Dhanyawaad.
Via Whatsapp Mid-Night blogging.